meqe’: Some stories about snow


Ruby Peter | Sti’tum’at.

One day in 2014 when we were working, the power went off and it was a beautiful snowy day outside. So Ruby decided to talk about snow.

pi’psatul’ ’u thu meqe’

 

kwus pipsatuls tthu hiiw’a’lum.

’i’ ni’ yel’kwtus thu meqe’ sus ’uw’ pi’psatul’.

nuw’ shhwiiyusth ’ul’ tthu swaw’lus stl’ul’iqulh ’u thu meqe’ kwus hiiw’a’lum.

ni’ hay!

swuyqe’ meqe’.

siilt thu meqe’ yuw’en’.

yuw’en’ kwthu thaas siil’t-hw.

ni’ ch siilt ni’ ’u tthu shni’s kwthu plhet meqe’ ’un’s neem’ ’uw’ yu si’ult ’i’ ni’ ’uw’ hwu thaas ’ul’.

nilh kwthuw’ sht’es ’ul’ kws this kwthu ni’ ’un’s smustimuhwstuhw kwthu ’un’ swuy’qe’ meqe’.

kwus wulh tl’am ’i’ ni’ ch ’unuhw.

ni’ ch hwi’ qul’et thuyt kwthu ’uhwiin’ tl’e’ ch ’uw’ siilt.

ni’ ch xtsut kw’sht’es kws this kwthu [ni’ tse’ ] hwu sxuy’usth kwthun’ meqe’, swuy’qe’ meqe’.

sht’es ’ul’ ’i’ ni’ ch tl’umstuhw kws nilhs tse’ sxuy’uths ’un’s nuw’ tuyum’t ts’e’t ’u kwthu thas niilh siilt-hw.

kwunut kwthu shewuq ’i’ nilh ni’ muqsuns.

suw’q’ ’u kwthu smeent, smunmeent nilh tse’ ni’ qulum’s, ’i’ kwthu thathuns.

nuwu ’ul’ ni’ yu xetst kwthu yu t’utuyum’tuhw kwus hwu sthuthi’ hwu st’e ’ukw’ sxuy’usth hwu s’athusth.

tuyum’t kwthu tl’uhwlhnentuns.

nem’ ch kwunut kwthu sts’ushtustsus ’un’ suw’ miq’ut nilh ni’ t’ul’teluw’s yuse’lu.

ha’ ch ni’ tsyasa’qw ’uw’ niihw ’uw’ tsyasa’qw ’i’ tuyum’t ch kwthu yasa’qw.

’i’ smunmeent kwthu ni’ qulum’s.

ha’ ’un’ stl’i’ ’i’ ni’ ch ’uw’ tsqw’oon’stuhw kwthu smunmeent.

nuwu ’ul’ nuw’ yu yuxetst kwthu ni’ sht’es ’i’ ni’ hwu st’e ’uw’ niis hwu mustimuhw kwthu ni’ thuytuhw swuy’qe’ meqe’.

ni’ hay.

 

s’imuluts

nilh ’u kwsus yiq ’uw’ niis st’ee ’ukw’ ’apun tintun.

ts’uhwle’ ’i’ tl’lim’ nuw’ nuts’a’ skweyul kws yi’yuqs ’i’ ni’ hay ’ul’ hwu plhet thu me’qe’.

’i’ st’e ’ukw’ yuse’lu sxun’u kws plhet-s.

’i’ nilh xut’ustum’ s’imuluts.xwum’ ’ul’ kwsus hwu plhet sus ’uw’ thut tthu s’ul’eluhw, “ni’ tst wulh s’imuluts.”

mukw’stem ni’ kweel.

ni’ kwelshus thu meqe’, tthu syalh tthu ni’ ’u tthu s’e’tl’q tthu…skw’ey kwun’s kwunnuhw.

nilh xut’ustum s’imuluts.

’uw’ niis yiqum tun’ni’ ’u tthu lelum’.

’i’ m’i yiqum ’i’ nilh tl’uw’ xut’ustum’ s’imuluts.

ni’ ’imutus kwthuw’ mukw’stem ni’ [ni’ ’u tthu tumuhwhul’q’elh] ’u kwsus wulh m’i’ yiqum.

nilh xut’ustum’ s’imuluts.

thi’matsustum tthu me’

 

hunum’ tthunu men ’u tthu shthiim’ulh ’i ’utl’ kwa’mutsun.

suw’ hul’ts’tus tthu lisek ni’ lhlukw ’u kwus nem’ thiim’ulh.

hun’umutnuhwus tthu hay ’ul’ qux kw’suts ’i’ kwsus ’uw’ hwun’a’ ’ul’ hun’umut, we’ kwus ’uw’ tstth’xwa’lutsa’ ’i’ tl’lim’ nuw’ thima’tum tthu tselushs.

ni’ yu sthithuma’ tthu tselush kwus m’i hun’umut.

’i’ ’uwu kws nem’s ’u thu huy’qw nilh kwus nem’ ’u tthu, m’i hwiw’shum ’utl’ …. hwiwshus thunu ten tthu xuytl’ qa’ sus ’uw’ qwsutus tthu tselushs ’u tthu xuytl’ qa’ yuw’en’ yelh sus quwutssum.

nus ’uw’ putum’, “nutsim’ kwu’elh ’un’sh ni’ … ’uwu niihw ’uw’ quwutsum ’ul’.”

’i’ ni’ thut kws xwums ’i’ q’ulq’ul’ptum tthu tselushs.

xlhiluws ’uw’ niis quwutsstum yuw’en’.

nilh shus qwsutus ’u tthu qa’ [yuw’en’.]

sus ’uw’ ste ’uw’ niis qtl’um tthu sthima’s yelh sus qustssum.

 

ni’ hay!

_____________________

DG transcribed in 3/3/14.
Note yet proofread.